琴晚發現心怡左邊嘴角下面有少少口水敏感，可能係出緊2隻大牙仔，流多左啲口水。今晚訓覺前幫佢搽左啲cream，摸落去有啲鞋鞋地粒粒，應該有d痕痕痛痛，幫佢搽完之後又叫我搽多啲膏膏。我順勢咁講話係因為啜手指啲口水攪到痛痛，氹佢唔好啜手喇，佢有試下啜一陣，可能又食到少少苦膏，又叫我搽多次。跟住佢突然主動話：「唔好啜手喇！」我驚訝得嚟即刻俾佢方法佢叫佢試下攬住迷你腸訓，佢真係有照做到！努力用力攬住，用力合埋對眼，跟住鬆開手時我諗住都應該係會啜番，點知佢轉另一個姿勢—樹熊式抱住大腸腸，隻手指有想放入嘴，但喺門口就停左，阿媽我興奮得嚟要停止呼吸慢慢裝下佢係咪真係無啜住訓！果然真係做到了！😆 係咪真架，係咪可以有意識戒啜手喇？心怡加油呀！😍
心怡「學前預備班」第1日咩住書包仔番學喇！好叻女，無喊無扭，2個鐘途中有叫搵媽咪，有聽老師話乖乖等放學先搵媽咪。雖然對心怡有信心，但聽到佢叫媽咪，真係有衝動入去攬住佢！接放學眼神交流嗰刻見到佢係自信開心笑，我好感動又矛盾！😂😂 上堂時老師都會間唔時SEND相俾我，等我了解下心怡的上堂情況同埋玩緊乜野，呢個都幾令我安心!
上星期試堂時心怡都好肯跟老師玩，對環境又好奇，加上播住佢首最愛歌the wheels on the bus，佢又拍手又跟住唱，個人更加放鬆左。都可能係佢有印象之前上堂玩，知道大概咩回事。10mins左右，老師話試下做分離，啊？！心怡中途係咁意搵過我1次，之後課堂中佢啲笑聲大聲到班房外都聽到！
聽完主任分析講解後就決定報堂了。未有心理準備下所有野突然加快左，諗都無諗過咁快就可以分離，同埋成個幼稚園模式咁。有齊書包仔，有手冊，有獨立畫畫工具袋，仲有要帶餐具片片後備衫褲番學。
講番轉頭，送左心怡番學之後，係就係話突然多左接近2個鐘自由時間，但其實仲有大把事情要處理…. 首先去左食個早餐，之後諗住買埋送，番屋企煲定飯，同步洗機衫。如果做得晒就太完美喇!! 結果最後係食緊早餐同時要處理公司野，攪得黎已經11點，急急腳去買送，去到街市有選擇恐懼症咁，兜黎兜去唔知買咩好，最後11點差唔多20分買完上樓，洗埋米洗定菜飲啖水已經又要準備出門去接放學… D時間充實到不得了!!
滿心歡喜去接心怡放學，知道佢課堂玩得好開心，似乎仲有d意猶未盡，放學番屋企條路會經過幾個細公園仔，佢個個都話要去玩陣，之之阻阻都玩左成大半個鐘亦都放左盡電… 番到屋企二話不說lunch都未食就要訓覺!! 阿媽我好攰…就黎無電，但見到個囡開心，心甘命抵呢!!!
話說終於都報左名上playgroup試堂！
為左第一次上playgroup, 我緊張囉囉攣左幾日！新手真係新手，因為未試過帶心怡上過堂，唔知佢會咩反應，臨場控唔控制到，同埋知道有成班家長一齊，唔知點解有壓力🤔
講番心怡當日開頭比較觀察型，最鐘意觀察部音響😂😂，因為第1堂唔熟悉啲steps，留意多陣其他小朋友點做，佢都即時投入番，都好雀躍下添啵！1個鐘入面突然要吸收好多新事物同適應聽指令，阿媽我都覺得要啲時間消化😂😂
整體嚟講課堂都係幾多元化，好開心，輕鬆舒服，老師都好有耐性同聲線語調非常好！👍心怡落堂後都唔捨得走。
琴日，爸爸扮點名叫心怡，佢已經知道要舉手叫「到」😂😂
＃高寶幼兒中心
＃阿媽知錯下次著番褲仔
＃見到心怡上堂大感觸
＃話咁快就話要講老師早晨
＃柏麗排長龍等電梯唔係講笑
＃不忘初衷只要妳健康快樂
