【每天成長一點點】心怡識得講「1」字

每日放工加上長途車忙緊搵N班資料, 番到屋企都已經7點3。雖然好攰, 但開門見到心怡期待見到自己嘅笑容,真係神奇地已經快速叉滿番電!!

全日最幸福最珍貴嘅親子時間只有短短的3-4個鐘,我好珍惜每一刻同佢嘅互動,盡量都會全程投入同佢玩。問下佢今日玩左D咩, 睇左咩書書? 佢當然未識答我, 但見佢會好興奮咁拎佢手上嘅玩具俾我, 眼神充滿童真, E E YA YA似乎想表達D咩,呢一刻我希望時間過得慢少少…..

今晚見到心怡識得指住個「1」字之外,仲識講!! 間唔時仲會重覆呢個發音。好明顯地佢係認得個1字。好好彩心怡暫時對睇書都幾有興趣,每日早晚會睇下書, 日間時間有時又會鐘意翻下。最鐘意睇動物書,聽到動作叫聲!!  我唔知佢呢個歲數認字能力算係強定弱, 不過喺我眼中, 係件感動感恩嘅事heart!!  由於在職媽媽身份,心怡日間時間係由嫲嫲湊,親子互動嘅時間唔多,可以做可以教嘅非常有限… 只可以濃縮左喺晚上嘅3個鐘裡面,盡量發揮小宇宙。其實係有擔心咁樣會唔會間接令心怡生活體驗少左, 學嘅野相對少左… 始終父母都會有自己嘅一套教育方式,而老人家未必理解或配合做到。所以,每當心怡有少少嘅進步,對於我黎講係一個努力嘅成果,值得感動嘅事!

我明白雙職父母其實好普遍,我只不過係其中嘅一個家庭。所以希望可以成功報讀到N班,等心怡多一個機會接觸同適應群體生活,有老師同學仔陪佢玩遊戲唱下歌仔。開開心心笑騎騎又一日!!laugh