DJI Osmo Pocket到手試玩 (非專業)

一睇就買到DJI Osmo Pocket,好開心好開心!! 多謝爸B!! 已經急不及待想要追住心怡瘋狂影錄影!! XDDD 

飲完茶心思思去百老匯望下Osmo Pocket有幾Mini同效果如何,之前有試用過朋友的DJI大支裝,真係好穩定。依家呢部Pocket仲有埋相機,睇下有幾勁先!!  

事先講明,我係非專業攝影,純粹用家實評XDD 仲要D時間去學習點樣玩。 如果需要專業詳盡介紹,要麻煩去番專業嘅產品介紹。

價錢:$2999 (加送64GB  SD Card) —>百老匯價

外觀:全黑機身,真係非常非常咁輕巧同輕身!!!  依家樣樣都追求大部大MON,突然睇到咁細個MON覺得好得意。細細支同部電話差唔多咁長,同部電話差唔多重量。相比起上大大支嘅雲台,呢樣真係無得輸!! 最重要係唔駛下下插住電話先用得,如果想個鏡頭大D先插電話又得。細細部隨時拎起手就影,媽咪袋亦唔會有太重負擔。唔需要因為太新同埋貨源唔夠(當日職員話都係得番4部度),連百老匯都無DEMO機試玩。所以買之前都要靠幻想實物係點嘅。

操作:首先要手機裝番DJI本身個APP,先可以等連接時去到DJI影相畫面。單手控制非常簡單方便,1秒開機,又有快速自動收合鏡頭,按2下就快速回中,按3下開機制就可以輕鬆轉換鏡頭變自拍或影街。因為未有配到伸縮棍,自拍畫面唔太闊,只係影到2個大人頭。

影像質素:4K鏡頭,有自動追蹤目標功能,呢個好玩!! Double Click個目標後,就會跟住佢移動,不過如果郁得太快或跳得太高,雲台未必追到,之後會提示”目標丟失”… 哈哈哈哈!! 所以應該拍攝者同目標都要同時移動會影得好D。試過我跳住錄影目標,睇番阿目標唔會面容扭曲無起格,但會FEEL到我跳得好勁下!! 

儲存資料:過相落手機要將電話插住雲台,按指示做,好簡單易明!

電力:新買未充過電,開機電力約60%。試過連續不停試機玩錄影同拍攝同埋教SETTING,玩左成個幾鐘,都只係用左好少電力,不過部機會有少少熱,但未至於炙熱,天氣凍凍地當埋暖蛋,哈哈哈哈…. 第2日開機再玩,都仲有成50%電力。

MimiJw個人總結:Osmo Pocket同HTC RE的方便程度有D相似,但有埋雲台添啵!  可以穩定地影住好動嘅小朋友,輕便,同埋平過一般相機,去旅行或去街玩都可以影到高質素,留低小朋友最可愛嘅一刻,的確係值得買!!  

我覺得都相當穩定,實際播放像素再清D靚D。